Tua Palavra

|Salmos 40:1| Баш чалгъыджы ичюн. Давутнынъ зебуры.

|Salmos 40:2| Не де бахтлыдыр фукъарени тюшюнген адам! Яман кунюнде РАББИ оны къуртарыр.

|Salmos 40:3| РАББИ оны къорчалар, онынъ омрюни сакълар, ве о, ер юзюнде бахтлы олур. Сен оны душманларнынъ истегенине бермезсинъ, я РАББИ.

|Salmos 40:4| О, хасталыкъ тёшегинде яткъанда, РАББИ онъа кучь берер. О, хаста олгъанда, Сен Озюнъ оны тедавийледжексинъ!

|Salmos 40:5| Мен дедим: «Манъа мерамет эт, я РАББИ! Мен Санъа къаршы гуна япкъан олсам да, джанымны яхшы эт.

|Salmos 40:6| Душманларым мени яманлап: “Не вакъыт олер де, не вакъыт онынъ ады ёкъ олур?” — дейлер».

|Salmos 40:7| Олар мени корьмеге кельсе де, ялан айтып, юрегинде яманлыкъ топлайлар, тышарыгъа чыкъар-чыкъмаз, лаф уйдуралар.

|Salmos 40:8| Мени кореджек козю олмагъанлар эписи озьара фысылдашып, манъа къаршы яманлыкъ япмагъа ниетленелер.

|Salmos 40:9| «Ольдюриджи беля-къаза япышты онъа; шунынъ ичюн бир яткъан сонъ, энди еринден турмаз!» — дейлер.

₁₀

|Salmos 40:10| Мен ишангъан достум биле, отьмегимни ашап, манъа къаршы табаныны котерди.