Tua Palavra

|Job 11:1| Сонда наамалы Софар былай деди:

|Job 11:2| — Сонша көп сөз жуўапсыз қала ма? Көп сөйлеген адам ақлана ма?

|Job 11:3| Мылжың гәплериң адамлардың тилин тыйып қойсын ба? Масқаралағаныңда, сени ҳеш ким уялтпасын ба?

|Job 11:4| Сен: «Тәлимим минсиз, Өзим де Қудайдың алдында пәкпен», — дейсең.

|Job 11:5| Қәне, енди Қудай жуўап берип, Саған қарсы тил қатып,

|Job 11:6| Даналықтың сырларын билдирсе еди! Себеби даналық көп қырлы ғой. Билип қой, Қудай гүналарыңның базыларын жеңил жазалайды.

|Job 11:7| Қудайдың терең сырларын түсине аласаң ба? Қүдирети күшли Қудайдың шегине жете аласаң ба?

|Job 11:8| Қудайдың даналығы аспаннан да бийик, сен не қыла аласаң? Өлилер мәканынан да терең, не биле аласаң?

|Job 11:9| Оның өлшеми жерден де узын, Теңизден де кең.

₁₀

|Job 11:10| Егер Қудай келип, зинданға тасласа, Ҳүким етиў ушын шақырса, ким Оған тосқынлық қыла алады?