Tua Palavra

|Isaías 51:1| שמעו אלי רדפי צדק מבקשי יהוה; הביטו אל-צור חצבתם, ואל-מקבת בור נקרתם:

|Isaías 51:2| הביטו אל-אברהם אביכם, ואל-שרה תחוללכם; כי-אחד קראתיו, ואברכהו וארבהו: ס

|Isaías 51:3| כי-נחם יהוה ציון, נחם כל-חרבתיה, וישם מדברה כעדן, וערבתה כגן-יהוה; ששון ושמחה ימצא בה, תודה וקול זמרה: ס

|Isaías 51:4| הקשיבו אלי עמי, ולאומי אלי האזינו; כי תורה מאתי תצא, ומשפטי, לאור עמים ארגיע:

|Isaías 51:5| קרוב צדקי יצא ישעי, וזרעי עמים ישפטו; אלי איים יקוו, ואל-זרעי ייחלון:

|Isaías 51:6| שאו לשמים עיניכם והביטו אל-הארץ מתחת, כי-שמים כעשן נמלחו והארץ כבגד תבלה, וישביה כמו-כן ימותון; וישועתי לעולם תהיה, וצדקתי לא תחת: ס

|Isaías 51:7| שמעו אלי ידעי צדק, עם תורתי בלבם; אל-תיראו חרפת אנוש, ומגדפתם אל-תחתו:

|Isaías 51:8| כי כבגד יאכלם עש, וכצמר יאכלם סס; וצדקתי לעולם תהיה, וישועתי לדור דורים: ס

|Isaías 51:9| עורי עורי לבשי-עז זרוע יהוה, עורי כימי קדם, דרות עולמים; הלוא את-היא המחצבת רהב מחוללת תנין:

₁₀

|Isaías 51:10| הלוא את-היא המחרבת ים, מי תהום רבה; השמה מעמקי-ים, דרך לעבר גאולים: