Tua Palavra

|Isaías 36:1| ויהי בארבע עשרה שנה למלך חזקיהו, עלה סנחריב מלך-אשור על כל-ערי יהודה הבצרות ויתפשם:

|Isaías 36:2| וישלח מלך-אשור את-רב-שקה מלכיש ירושלמה אל-המלך חזקיהו בחיל כבד; ויעמד, בתעלת הברכה העליונה, במסלת שדה כובס:

|Isaías 36:3| ויצא אליו אליקים בן-חלקיהו אשר על-הבית; ושבנא הספר, ויואח בן-אסף המזכיר:

|Isaías 36:4| ויאמר אליהם רב-שקה, אמרו-נא אל-חזקיהו; כה-אמר המלך הגדול מלך אשור, מה הבטחון הזה אשר בטחת:

|Isaías 36:5| אמרתי אך-דבר-שפתים, עצה וגבורה למלחמה; עתה על-מי בטחת, כי מרדת בי:

|Isaías 36:6| הנה בטחת על-משענת הקנה הרצוץ הזה על-מצרים, אשר יסמך איש עליו, ובא בכפו ונקבה; כן פרעה מלך-מצרים, לכל-הבטחים עליו:

|Isaías 36:7| וכי-תאמר אלי, אל-יהוה אלהינו בטחנו; הלוא-הוא, אשר הסיר חזקיהו את-במתיו ואת-מזבחתיו, ויאמר ליהודה ולירושלם, לפני המזבח הזה תשתחוו:

|Isaías 36:8| ועתה התערב נא, את-אדני המלך אשור; ואתנה לך אלפים סוסים, אם-תוכל לתת לך רכבים עליהם:

|Isaías 36:9| ואיך תשיב, את פני פחת אחד עבדי אדני הקטנים; ותבטח לך על-מצרים, לרכב ולפרשים:

₁₀

|Isaías 36:10| ועתה המבלעדי יהוה, עליתי על-הארץ הזאת להשחיתה; יהוה אמר אלי, עלה אל-הארץ הזאת והשחיתה: