Tu Palabra 
Portugués
Italiano
Español
Inglés
Francés
Arábica
Mandarín
Hindi
Alemán
Fore New Testament 
-
|Apocalipsis 15:1| Pigoya, naeba to agauwapa, to ka tabe awameꞌena mantabinti agamagi, pika uwaena nagi napintuwe. Piya, tonaentisa tara umaema enisore kinaꞌmiba tonaentisa tara umaema ataenarakaꞌya wasana puwaitakenaena urintugu agantuwe. Piyama pi nkataenamaba uma aꞌya wakana, aintiba to kapa kampa aborakiye. Kampaye. Pi nkataenamaba aꞌya wakanaba, Koti nkamoꞌenawapa aꞌya wakiye.
-
|Apocalipsis 15:2| Piya, naeba tabe kayo wani kantaenaba agantuwe. Pipa karasirasabe yakutasabe pumaranti kanta poga agantuwe. Piya, wasanamiba kabu kinape amankape agegaꞌewama ntampawape asu igasume kinaꞌmiba pi karasi waninkama nkatata asima mimagini Koti kitawapa uꞌma mintantawe.
-
|Apocalipsis 15:3| Igeba mimagini, Koti kayokaya yagara Mosese nkinibe, sipisipi awaroma nkinibe mayama sewe:We, Waꞌega Koti, taberakaꞌyane. Aꞌyaꞌma pempentanagapa tabe pegi agategi uwaena tagi napiyune, iye.We, miyaba Waꞌega, aꞌyaꞌma kikapa arupu puma tagatakaꞌyane, iye.
-
|Apocalipsis 15:4| We, Waꞌega, kae kabintoga aotatakaꞌya miyekana, kebaya kaekaba kampa aekuru pumagina, kebaya kampa kagegaꞌeba asagayukiye, a. Pipa kampaye, iye.Piya, arupu yuga pekana agogapa aborawaeyagini, aꞌyaꞌma maga maga kinaꞌmiba kanama kae kagisukibewe, piya ini yewe.
-
|Apocalipsis 15:5| Piya, ainti to agauwapa, mantabinti kairasa kimaranta mono namankapa aꞌwaiwaintoga agantuwe. Pi ntamapa Koti miyemi ntamane.
-
|Apocalipsis 15:6| Piya, pi tonaentisa tara umaema enisore kinaꞌmiba tonaentisa tara umaema ataena puwaitakenaenaba urite, pi tabe mono namapisa irosaꞌma kanantawe. Igeba eꞌwasa wae kai amimagini korirasa ibamukantiba kintawe.
-
|Apocalipsis 15:7| Aibuguna, tarawa tarawaki iyoganta kinapisa kaꞌwainaba tonaentisa tara umaema korirasa tuꞌna maema tonaentisa tara umaema enisore kinapa imintiye. Piyama pi tuꞌnapipa miyaba Koti nkamoꞌenawapa pumaewantiye.
-
|Apocalipsis 15:8| Pumaema imogini maeyuguna, Koti nkeꞌwasabisabe esegiyenawapisabe kunka kima pi mpono namapa pumaewaugu agantuwe. Piya, tonaentisa tara umaema enisore kinaꞌmi ataena puwaitakenaenaba kampa aꞌya puntogana, kaꞌwainaba pi mpono namapintiba kampa ubaiꞌma wakena puntiye.
