Tua Palavra 
Português
Italiano
Espanhol
Inglês
Francês
Árabe
Mandarim
Hindu
Alemão
Modern Hebrew Bible: Tanakh 
-
|Ezequiel 4:1| ואתה בן-אדם קח-לך לבנה, ונתתה אותה לפניך; וחקות עליה עיר את-ירושלם:
-
|Ezequiel 4:2| ונתתה עליה מצור, ובנית עליה דיק, ושפכת עליה סללה; ונתתה עליה מחנות ושים-עליה כרים סביב:
-
|Ezequiel 4:3| ואתה קח-לך מחבת ברזל, ונתתה אותה קיר ברזל, בינך ובין העיר; והכינתה את-פניך אליה והיתה במצור וצרת עליה, אות היא לבית ישראל: ס
-
|Ezequiel 4:4| ואתה שכב על-צדך השמאלי, ושמת את-עון בית-ישראל עליו; מספר הימים אשר תשכב עליו, תשא את-עונם:
-
|Ezequiel 4:5| ואני, נתתי לך את-שני עונם, למספר ימים, שלש-מאות ותשעים יום; ונשאת עון בית-ישראל:
-
|Ezequiel 4:6| וכלית את-אלה, ושכבת על-צדך הימוני (הימני) שנית, ונשאת את-עון בית-יהודה; ארבעים יום, יום לשנה יום לשנה נתתיו לך:
-
|Ezequiel 4:7| ואל-מצור ירושלם תכין פניך, וזרעך חשופה; ונבאת עליה:
-
|Ezequiel 4:8| והנה נתתי עליך עבותים; ולא-תהפך מצדך אל-צדך, עד-כלותך ימי מצורך:
-
|Ezequiel 4:9| ואתה קח-לך חטין ושערים ופול ועדשים ודחן וכסמים, ונתתה אותם בכלי אחד, ועשית אותם לך ללחם; מספר הימים אשר-אתה שוכב על-צדך, שלש-מאות ותשעים יום תאכלנו:
-
|Ezequiel 4:10| ומאכלך אשר תאכלנו, במשקול עשרים שקל ליום; מעת עד-עת תאכלנו:
