Tua Palavra

|Ezequiel 30:1| ויהי דבר-יהוה אלי לאמר:

|Ezequiel 30:2| בן-אדם הנבא ואמרת, כה אמר אדני יהוה; הילילו הה ליום:

|Ezequiel 30:3| כי-קרוב יום, וקרוב יום ליהוה; יום ענן, עת גוים יהיה:

|Ezequiel 30:4| ובאה חרב במצרים, והיתה חלחלה בכוש, בנפל חלל במצרים; ולקחו המונה, ונהרסו יסודתיה:

|Ezequiel 30:5| כוש ופוט ולוד וכל-הערב וכוב, ובני ארץ הברית; אתם בחרב יפלו: פ

|Ezequiel 30:6| כה אמר יהוה, ונפלו סמכי מצרים, וירד גאון עזה; ממגדל סונה, בחרב יפלו-בה, נאם אדני יהוה:

|Ezequiel 30:7| ונשמו בתוך ארצות נשמות; ועריו בתוך-ערים נחרבות תהיינה:

|Ezequiel 30:8| וידעו כי-אני יהוה; בתתי-אש במצרים, ונשברו כל-עזריה:

|Ezequiel 30:9| ביום ההוא, יצאו מלאכים מלפני בצים, להחריד את-כוש בטח; והיתה חלחלה בהם ביום מצרים, כי הנה באה: ס

₁₀

|Ezequiel 30:10| כה אמר אדני יהוה; והשבתי את-המון מצרים, ביד נבוכדראצר מלך-בבל: