Tu Palabra 
Portugués
Italiano
Español
Inglés
Francés
Arábica
Mandarín
Hindi
Alemán
МагӀарул мацӀ 
-
|Marcos 13:11| Судалда цере чІезе нуж рачараб мехалъ, щибдай бицинаян цебеккунго ургъел ккоге нужеда. ГьебсагІат нужерго рекІелъе рещтІараб жо абун биччай. Щайгурелъул нуж гуро гьебмехалъ кІалъазе ругел, нужер рекІелъе рещтІараб Илагьияб РухІин кІалъазе бугеб.
-
|Marcos 13:12| Вацас вац кьезе вуго чІвазе, инсуца вас кьезе вуго. Жидерго эбел-инсуда данде рахъун, лъималаз гьелги кьезе руго чІвазе.
-
|Marcos 13:13| Дун сабаблъун киналго гІадамазда рихина нуж. Амма ахиралде щвезегІан сабру гІурав чи хвасарлъила.
-
|Marcos 13:14| БукІинего бегьулареб бакІалда чІунтелалъул къабихІлъи бихьила нужеда, - цІалулесда лъалин гьелъул магІна, - гьебмехалъ мугІрузде лъута абе Ягьудиялда ругелал.
-
|Marcos 13:15| Гьеб къоялъ тІохда вугев гъоркье рещтІунгеян абе, къваригІараб-тараб босизе рокъове жаниве лъугьунгеян абе.
-
|Marcos 13:16| Хурив вугевги жиндирго ретІел босизе нахъвуссунгеян абе.
-
|Marcos 13:17| Вай, къинал руччабазе ва каранда хахулел лъимал ругел улбузе букІинаха дол къояз кІудияб къварилъи-гІазаб!
-
|Marcos 13:18| Хасало лъутизе ккогегиян гьари-дугІа гьабулел рукІа нуж.
-
|Marcos 13:19| Щаян абуни, гьебмехалъ рещтІине буго Аллагьас дуниял бижаралдаса гьанжелъагІан букІинчІеб ва хадубккун букІине къотІиги гьечІеб гІадинаб балагь.
-
|Marcos 13:20| Гьел къоял къокълъизаризе БетІергьанасул къадар букІинчІебани, цониги рижи хвасарлъизе букІинчІо. Амма жинцаго тІаса рищарал гІадамазе гІоло гьел къоял къокъ гьаризе хІукму буго гьесул.
