Tua Palavra 
Português
Italiano
Espanhol
Inglês
Francês
Árabe
Mandarim
Hindu
Alemão
Modern Hebrew Bible: Tanakh 
-
|Neemias 1:1| דברי נחמיה בן-חכליה; ויהי בחדש-כסלו (כסליו) שנת עשרים, ואני הייתי בשושן הבירה:
-
|Neemias 1:2| ויבא חנני אחד מאחי הוא ואנשים מיהודה; ואשאלם על-היהודים הפליטה אשר-נשארו מן-השבי ועל-ירושלם:
-
|Neemias 1:3| ויאמרו לי, הנשארים אשר-נשארו מן-השבי שם במדינה, ברעה גדלה ובחרפה; וחומת ירושלם מפרצת, ושעריה נצתו באש:
-
|Neemias 1:4| ויהי כשמעי את-הדברים האלה, ישבתי ואבכה, ואתאבלה ימים; ואהי צם ומתפלל, לפני אלהי השמים:
-
|Neemias 1:5| ואמר, אנא יהוה אלהי השמים, האל הגדול והנורא; שמר הברית וחסד, לאהביו ולשמרי מצותיו:
-
|Neemias 1:6| תהי נא אזנך-קשבת ועיניך פתוחות לשמע אל-תפלת עבדך אשר אנכי מתפלל לפניך היום יומם ולילה, על-בני ישראל עבדיך; ומתודה, על-חטאות בני-ישראל אשר חטאנו לך, ואני ובית-אבי חטאנו:
-
|Neemias 1:7| חבל חבלנו לך; ולא-שמרנו את-המצות, ואת-החקים ואת-המשפטים, אשר צוית את-משה עבדך:
-
|Neemias 1:8| זכר-נא את-הדבר, אשר צוית את-משה עבדך לאמר; אתם תמעלו, אני אפיץ אתכם בעמים:
-
|Neemias 1:9| ושבתם אלי, ושמרתם מצותי, ועשיתם אתם; אם-יהיה נדחכם בקצה השמים משם אקבצם, והבואתים (והביאותים) אל-המקום, אשר בחרתי, לשכן את-שמי שם:
-
|Neemias 1:10| והם עבדיך ועמך; אשר פדית בכחך הגדול, ובידך החזקה:
