Tua Palavra

|Obadias 1:1| חזון עבדיה; כה-אמר אדני יהוה לאדום, שמועה שמענו מאת יהוה וציר בגוים שלח, קומו ונקומה עליה למלחמה:

|Obadias 1:2| הנה קטן נתתיך בגוים; בזוי אתה מאד:

|Obadias 1:3| זדון לבך השיאך, שכני בחגוי-סלע מרום שבתו; אמר בלבו, מי יורדני ארץ:

|Obadias 1:4| אם-תגביה כנשר, ואם-בין כוכבים שים קנך; משם אורידך נאם-יהוה:

|Obadias 1:5| אם-גנבים באו-לך אם-שודדי לילה, איך נדמיתה, הלוא יגנבו דים; אם-בצרים באו לך, הלוא ישאירו עללות:

|Obadias 1:6| איך נחפשו עשו, נבעו מצפניו:

|Obadias 1:7| עד-הגבול שלחוך, כל אנשי בריתך, השיאוך יכלו לך אנשי שלמך; לחמך, ישימו מזור תחתיך, אין תבונה בו:

|Obadias 1:8| הלוא ביום ההוא נאם-יהוה; והאבדתי חכמים מאדום, ותבונה מהר עשו:

|Obadias 1:9| וחתו גבוריך תימן; למען יכרת-איש מהר עשו מקטל:

₁₀

|Obadias 1:10| מחמס אחיך יעקב תכסך בושה; ונכרת לעולם: