Tua Palavra

|Ageu 2:1| בשביעי בעשרים ואחד לחדש; היה דבר-יהוה, ביד-חגי הנביא לאמר:

|Ageu 2:2| אמר-נא, אל-זרבבל בן-שלתיאל פחת יהודה, ואל-יהושע בן-יהוצדק הכהן הגדול; ואל-שארית העם לאמר:

|Ageu 2:3| מי בכם הנשאר, אשר ראה את-הבית הזה, בכבודו הראשון; ומה אתם ראים אתו עתה, הלוא כמהו כאין בעיניכם:

|Ageu 2:4| ועתה חזק זרבבל נאם-יהוה וחזק יהושע בן-יהוצדק הכהן הגדול וחזק כל-עם הארץ נאם-יהוה ועשו; כי-אני אתכם, נאם יהוה צבאות:

|Ageu 2:5| את-הדבר אשר-כרתי אתכם בצאתכם ממצרים, ורוחי עמדת בתוככם; אל-תיראו: ס

|Ageu 2:6| כי כה אמר יהוה צבאות, עוד אחת מעט היא; ואני, מרעיש את-השמים ואת-הארץ, ואת-הים ואת-החרבה:

|Ageu 2:7| והרעשתי את-כל-הגוים, ובאו חמדת כל-הגוים; ומלאתי את-הבית הזה כבוד, אמר יהוה צבאות:

|Ageu 2:8| לי הכסף ולי הזהב; נאם יהוה צבאות:

|Ageu 2:9| גדול יהיה כבוד הבית הזה האחרון מן-הראשון, אמר יהוה צבאות; ובמקום הזה אתן שלום, נאם יהוה צבאות: פ

₁₀

|Ageu 2:10| בעשרים וארבעה לתשיעי, בשנת שתים לדריוש; היה דבר-יהוה, אל-חגי הנביא לאמר: