Tu Palabra 
Portugués
Italiano
Español
Inglés
Francés
Arábica
Mandarín
Hindi
Alemán
Ilajtulisli Yancuic toTata Jesucristo 
-
|Hechos 19:1| Quiman cataya Apolos pa Corinto, Pablo lamic paxaluc pa innojen caltilan hual cataloaya pin lomera (tepetilan) huan hualaya pa Efeso.
-
|Hechos 19:2| Nepa quinmitac sequin monextilinijmes huan quinmilic: —¿Hualac in Espíritu Santo pa amhuanten quiman anpehuac anquineltocac Cristo? Yehuanten quilije: —No, tehuanten amo tijcaquijque amaqui lajtúa inahuac in Espíritu Santo.
-
|Hechos 19:3| Huan Pablo quinlajlanic: —Cuaquín ¿len lamaxtilisli anquineltocaya quiman ancataya lacuayatequili? Quinanquilijque: —Ticataloaya lacuayatequili quinami quimaxtic Juan Lacuayatequini.
-
|Hechos 19:4| Pablo quinmilic: —Juan quincuayatequini lacames pa yoje lanextililosquiaya pampa quipalaje inminyolo pa laijnamiquisi quinami quinequi Dios. Noje Juan quinmilic pa quineltocalosquiaya in lacal hual yahuiaya huala quiman yihual Juan laquisac quichíac itequipanulisli hual Dios quitilanic pa yihual quichihuasquiaya. Huan in lacal unca Jesús in Cristo.
-
|Hechos 19:5| Quiman quicaquijque inon, cataloaya lacuayatequili quinami lamaxtic Jesucristo, quinoztataloaya Dios pan ipampa itoca Jesús.
-
|Hechos 19:6| Huan quiman quinlalilic Pablo imajmajuan inminpan yehuanten, hualaya pa inminyolo in Espíritu Santo huan pehualoaya lajtulo ca oc sequin lajtomes hual amo quiman quimatinijme lajtulo, huan laquetzaloaya Dios ilajtomes.
-
|Hechos 19:7| Yehuanten yeje quinami doce lacames.
-
|Hechos 19:8| Panuc inon, calaquic Pablo pa inmintiopan in judíos nepa pa Efeso, huan yihual pehuaya laquetza amo quimacajsitataya huan pa ye mesli quinnahuatiliaya quinami huelitía Dios. Quichihuaya mochi len huil pa quinnextiliaya pampa cataya melahuac inon hual quijtutataya.
-
|Hechos 19:9| Ma yoje, sequin ca in judíos mochicahualtije inminyolo pa camo quineltocalosquiaya in lajtol. Pehualoaya laquetzalo amo cuali inahuac Dios iojli. Cuaquinon mijcuanic Pablo capa yehuanten, quinhuicac ca yihual in monextilinijmes huan mojmosta quinmachiltiaya Dios ilajtol pa iescuela (imonextiloyan) se hual motocaya Tirano.
-
|Hechos 19:10| Yojque Pablo quichihuaya pa ome xixihuil, huan pampín, pin lalticpan Asia capa cataya Efeso, moxtin hual chantiloaya nepa quicaquiloaya Dios ilajtol. Cataloaya yehuanten hual judíos huan yehuanten hual amo judíos quicaquiloaya.
