Tu Palabra 
Portugués
Italiano
Español
Inglés
Francés
Arábica
Mandarín
Hindi
Alemán
Yaubada Yana Walo Yemidi Vauvauna 
-
|2 Corintios 12:1| Nuwahaehae nigele teya hava ana namwanamwa na nigele howahowagu ta awagu yagudui eeta mata yanuwahaehae. Hesi teina haugane enoꞌitaꞌita yo abiye mahalava Bada imomohegauwa mata yaꞌaubabadaedi.
-
|2 Corintios 12:2| Bolimai 14 bada hiꞌoviꞌo ainai tauyemidi yahanahanapui Yaubada iꞌabihini ta ihahaene galewa haehae aliꞌalilina ainai. Teina ivetuwuni neta matauna ilalaune bo aluꞌaluwa aꞌavana ilalaune nigele yayahanapui, na Yaubada ihanapuiyaꞌo.
-
|2 Corintios 12:3| Yahanapuiyaꞌo neta Yaubada teina tomowane iꞌabihiniyaꞌo ta ihahaeyeine yana abamiya wasawasana ainai. Teina ivetuwuni neta matauna ilalaune bo aluꞌaluwa aꞌavana ilalaune nigele yayahanapui. Yaubada ihanapuiyaꞌo. Na tenem ainai hava ibebenaledine nigele howahowana taꞌaubabadaedi yo nigele iyalowoinanei tomowa awadiyena hiwalowei.
-
|2 Corintios 12:5| Eeta teina vehabana mata yanuwahaehaeyei na yau vehabagu mata nigele yayanuwahaehaeyowegau. Hesi ginauli hava yagu tapitapiya hiꞌabiye mahalavadi mata yanuwahaehaeyedi.
-
|2 Corintios 12:6| Ebe nuwanuwagu yanuwahaehae mata yau nigele buwa wuwuna yawalowalo moiha. Eeta mata nigele yayanuwahaehae wuwuna nigele nuwanuwagu ebeha tomowa hiꞌabihinigau, na hava aliguwai hiꞌiꞌitadine yo hibebenaledine neta aidiyena hiꞌita lobaigau.
-
|2 Corintios 12:7| Teina abiye mahalavaone Yaubada imomohegaune neta moiha imwalaꞌi alili na Yaubada nigele nuwanuwana ebeha yanuwahaehae. Eeta vitai italamwei aliguwai dova haihaili womawomalina taugu iwomawomali. Na teina neta Tomodulele yana taupaihowa italaigau na iꞌabiye laumwauwigau ta mata nigele yanuwahaehae diꞌwa.
-
|2 Corintios 12:8| Teina vehabana na mai tonuga Bada ainai yaꞌawanoi ebeha haihaili womawomalina ivai vehulu.
-
|2 Corintios 12:9| Na hesi aliguwai iwalo, ‘Havena, yagu veꞌiꞌila owa howahowam wuwuna yam tapiya haugana neta yau yagu alaꞌalawowoli yana hauga wahiyala’. Ainaena na yayaliyaya alili yagu tapitapiya yagagasaedi neta mata Besinana alaꞌalawowoli aliguwai imwauwi.
-
|2 Corintios 12:10| Besinana vehabana na vetapitapiya yo walo hinahinali yo silahe yo taumuya yo vitai hauga maudoina aidiyena yanamwanamwa. Wuwuna yagu tapiya haugana neta abo yawahiyala moiha. Paulo inuwanuwatuwu Kolinita vehabadi.
-
|2 Corintios 12:11| Yagu walo dova yauyaule na hesi omiu ampaihowaigau eeta teina dova yaꞌauꞌaubabadane. Bada ebe amꞌawa namwanamwaegau, na hesi nigele. Teina tomowaone hiyogauyowedi tauyewasao gamwagamwanimiyai, na hesi nigele hiyanamwanamwa diꞌwaigau, bwagana yau ginauli awaꞌawawa.
