Tu Palabra 
Portugués
Italiano
Español
Inglés
Francés
Arábica
Mandarín
Hindi
Alemán
Yaubada Yana Walo Yemidi Vauvauna 
-
|Efesios 2:12| Mwalona omiu nigele Besinana yana boda, ainaena ammiya bala daodao, ta Isileli yana abaloina ammiya tulutuluhaei na Yaubada yana waloyemidi iwawalo mahalavaeiwa, nigele habuluna amyaꞌita lobai. Ainaena nigele amyaꞌita haeyei, wuwuna Yaubada nigele amyahanapui na nigele amyanuwanuwatuwui.
-
|Efesios 2:13| Mwalona ammiyawahi, na teina haugane Yeisu Besinana imwalowoi na ꞌwahinana isagena vehabamiu eeta ilauvaigomiu ta amlaomaꞌo vahalinai.
-
|Efesios 2:14| Mwalona tamiya tulutuluhauyoigita ta ai Yudeya na omiu nigele Yudeya na teina haugane Besinana yada miyawahei ihoꞌeyaꞌo na imwauwi iliꞌilimanigita daumwali alonai ta ita huhu ehebo.
-
|Efesios 2:15| Iya tauna ana ꞌoiyemwalowoi ainaena Mosese yana laugagayowo itauꞌauꞌauhigomiu maudoidi ibohoidi, eeta ilau ahaigita ta taveboda ehebo iya baidada, na nigele dova mwalona boda bwau himiyamiya, na teina hauga tamiya daumwali.
-
|Efesios 2:16| Hinage yada wahei aidiyena ilivahigita ta ivaigitama Yaubada ainai yo iya baidada taꞌawa auꞌaugeluyoꞌo, ta yana paihowane, iya tauna ehebo ainaena aiwa lagalaga ainai hiꞌoiye patu, ta veꞌalehaone hiꞌoꞌovine.
-
|Efesios 2:17| Ainaena Yeisunane ilaowa na daumwali iguguyaei omiu taumiya amwaha daodao alimiyai, yo ai hinage vahalinai amiyamiya alimaiyai.
-
|Efesios 2:18| Eeta iya ainaena, omiu yo ai Aluꞌaluwa ehebo ainaena ilauvaigita Tamada ainai.
-
|Efesios 2:19| Omiu mwalona taumanao ammiya wahiꞌo, na hauga teina hesi bada amvetaniwaga toyawaꞌo Yaubada yana bodao baidamiyao, na amveboda ehebo Yaubada yana huhu ainai.
-
|Efesios 2:20| Omiu hinage hiꞌabigomiu, eeta ita dova vada, na Yeisu Besinana iya yada wahuwahu, iya ainai logidi mwalaꞌidi neta Yeisu ana tausagenawasao yo tauwalo mahalavao,
-
|Efesios 2:21| na ainaena ita maudoida vada ana ginaginauli, na Yeisu iꞌabigita ta tayevada mwalaꞌina na veꞌaveꞌahihida.
